Wararkii ugu danbeeyay Dagaal Khasaare Badan Geystay oo Ka Dhacay Degmada Caabudwaaq!

Caabudwaaq, Juun 28, 2025 – Dagaal culus oo maanta ka dhacay degmada Caabudwaaq ee gobolka Galgaduud ayaa sababay khasaare isugu jira dhimasho iyo dhaawac, kadib markii uu iska horimaad xooggan dhexmaray ciidamada booliska degmada caabudwaaq gobolka galagduud  iyo koox maleeshiyaad ah oo deegaanka ka soo jeeda.

Weerarka ayaa bilowday abaara subaxnimadii hore saakay  isagoona soo gaaray gabaldhicii caawa , Sida ay warbaahinta u sheegeen goobjoogayaal ku sugan magaalada, rasaasta la isweydaarsaday ayaa socotay muddo farabadan, taasoo cabsi gelisay shacabka ku nool xaafadaha ay saameynta ku yeelatay rasaastan la isu adeegsaday manta.

Khasaaraha ka dhashay dagaalka ayaa ah mid culus. Wararka rasmiga ah ee laga helayo ilo caafimaad iyo booliska ayaa sheegaya in 10 ruux ay ku dhinteen, halka 7 kale ay ku dhaawacmeen. Dadka ku dhintay iyo kuwa dhaawacmay ayaa isugu jira ciidamo boolis ah, maleeshiyaad iyo dad rayid ah oo aan waxba galabsan risaastuna ku haleysay goobo ka fog halka dagaalku ka dhacay.

Sababta Dagaalka

Dagaalkan ayaa la rumeysan yahay inuu salka ku hayo muran la xiriira dhismaha saldhig boolis degmada caabudwaaq ee dowladda Galmudug ay ku sameynso dayactir ,Sida la sheegay, maleeshiyaadka weerarka qaaday ayaa kasoo horjeeday dhismaha saldhiggaas, taasoo keentay in ay weerar ku qaadaan ciidamada booliska ee ilaaliya goobta dhismaha.

Taliyaha Booliska Galmudug, Khaliif Maalin, oo warbaahinta la hadlay Caawa, ayaa si adag u cambaareeyay weerarka lagu qaaday ciidamada booliska, wuxuuna hoosta ka xariiqay in dowladdu aysan marnaba aqbali doonin in la hor istaago dhismaha xarumaha amniga ama lagu carqaladeeyo shaqada ciidamada.

“Gorgortan kama galeyno amniga degmada Caabudwaaq. Wadankuna dowlad ayuu leeyahay. Dadka dhibaatada geystay uma tiirineyno qabiil, ee waa danbiilayaal, waxaana ku wajihi doonaa gacan ciidamada dowladda.” ayuu yiri Taliye Khaliif, isagoo si toos ah fariin ugu diraya kooxaha falalka amni darrada kawada gudaha degmada caabudwaaq iyo guud ahaan Galmudug.

Taliyuhu waxa uu sidoo kale ugu baaqay shacabka degmada in ay garab istaagaan ciidamada booliska si loo sugo amniga, loogana hortago dhibaatooyinka kale ee laga yaabo inay soo noqdaan. “Shacabka Caabudwaaq waa in ay garabsiiyaan ciidanka booliska si looga hortago dhibaatada shacabka.”

Dhanka kale Dowladda Federaalka oo Ka Hadashay Dagaalka maanta ka dhacay Caabudwaaq wuxuu si weyn u gilgilay dareenka shacabka iyo mas’uuliyiinta dowladda federaalka Soomaaliya Wasiirka amniga ee Soomaaliya, Cabdiqaadir Fartaag, ayaa isna si kulul uga hadlay dhacdadan isagoo sheegay in dowladda aysan aqbali doonin falal amni darro ah oo lagu waxyeelaynayo shacabka iyo ciidamada dowlada iyo carqaladeynta adeegyada dadweynaha.

“Waxaan cambaareyneynaa weerarka lagu qaaday ciidamada booliska iyo shacabka Caabudwaaq Waa in si degdeg ah loola xisaabtamaa cid kasta oo ka dambeysay rabshadahaas, Dowladda dhexe waxay diyaar u tahay inay la shaqeyso Galmudug si looga hortago in dhacdooyinkan oo kale ay mar kale dhacaan,” ayuu yiri wasiirka Amniga Soomaaliya.

Ciidamo Dheeraad ah oo Loo Diray Caabudwaaq

Maamulka Galmudug ayaa durba bilaabay tallaabooyin lagu xasilinayo degmada Caabudwaaq,  Ilo xog ogaal ah ayaa xaqiijiyay in ciidamo dheeraad ah oo ka tirsan booliska Galmudug iyo xoogagga amniga la geeyay magaalada si ay uga qayb qaataan sugidda amniga iyo joojinta dhibaatada haatan ka taagan caabudwaaq.

Dadka deegaanka ayaa sheegay in weli xaaladda ay tahay mid kacsan, inkastoo rasaasta la joojiyay gelinkii dambe ee manta,  Dad badan ayaa ka cabsi qaba in xaaladdu kasii darto maalinta beri ah, maadaama aysan jirin xal dhab ah oo weli laga gaaray sababta dhabta ah ee keentay dagaalka Maanta.

Baaqyo Nabadeed

Odayaasha dhaqanka iyo qeybaha bulshada rayidka ah ee Caabudwaaq ayaa sidoo kale bilaabay dadaallo nabadeed, iyagoo ugu baaqaya labada dhinac in ay joojiyaan dagaalka oo lagu beddelo wada-hadal iyo isu tanaasul.

Sheekh Maxamed Xasan oo ka mid ah culimada deegaanka ayaa sheegay, “Waa wax laga xumaado in dhiig Soomaaliyeed uu daato si aan sax ahayn  Waxaan ugu baaqaynaa dhammaan beelaha iyo dowladda in la soo afjaro dagaalkan si shacabka loogu soo celiyo nabad iyo xasilooni .” tan iyo manta culimada deegaanka ayaa ku howlanaa joojinta dagaalka xilli si xoogan ay u soctay rasaasta labada dhinac ay isku adeegsaneyn.

Gunaanad

Dagaalka maanta dhacay ayaa ah digniin ku wajahan maamulka Galmudug iyo dowladda federaalka ah ee Soomaaliya, oo laga sugayo in ay si buuxda u xakameeyaan xaaladaha amni ee ka taagan deegaannada ay maamulaan,  Sida ay sheegeen dadka deegaanka, nabadgelyada Caabudwaaq waa tiir muhiim u ah xasiloonida guud ee gobolka Galgaduud.

Waxaana  lagama maarmaan ah in la dar dargaliyo wada hadalo nabadeed oo lagu baadi goobayo in laga hortago waxkasta oo wax u dhibaya nabadda degmada caabudwaaq oo sanadadii la soo dhaafay ka soo kabaneysay rabshadihii faraha badnaa oo maalinkasta dad farabadan ku dhiman jireen

 

Warbixintan waxaa diyaariyay Bulacle.com – Xarunta Wararka iyo Faallooyinka Dalka.