Hargeysa (bulacle.com) – Xukuumadda Somaliland ayaa maanta shaacisay in ictiraafka ay sanadaha badan raadineyso aysan u galeyn naxariis, isla markaana aysan dhibaato u keenayn dadka. Wasiirka arrimaha dibadda ee Somaliland, Cabdiraxmaan Daahir Aadan, ayaa khudbad ka jeediyay baarlamaanka, isagoo si cad u sheegay in mudnaanta koowaad la siinayo sidii Somaliland aqoonsi u heli lahayd.
Wasiirku wuxuu sidoo kale ka hadlay heshiiskii
is-afgarad ee sanadkii hore la gaaray Somaliland iyo Itoobiya, isagoo sheegay
in aan heshiiskaas ahayn mid daah-furan. “Waxay Itoobiya tiri; waxaynu ka
fikiraynaa ictiraafka marka aynu helno xeeb, meel ay yiraaahdeen Somaliland
baanu aqoonsanaynaa ma jirto,” ayuu yiri wasiirku mar uu ka jawaabayay
su’aalaha guddida arrimaha dibadda ee baarlamaanka.
Wasiirka Aadan ayaa intaas ku daray in xukuumadda
cusub iyo baarlamaanka ay dib u eegis ku sameyn doonaan heshiiskan, maadaama uu
ku jiro mad-madow badan oo u baahan in si taxadar leh looga fiirsado. “Waxaan
sameyn doonaa wax walba sidii aynu aqoonsi u heli lahayn, laakiin ictiraaf
cadaab ku geli mayno, dadkeenana baabi’in mayno,” ayuu raaciyay.
Wasiirka ayaa muujiyay in aanay wax macno ah lahayn in
Somaliland la iibiyo, iyadoo dadka kale loo ogolaanayo in ay maamulaan
kheyraadkooda iyo noloshooda, kaliya in la yiraahdo “waan idin aqoonsanay.”
Inkasta oo aanay jirin dal aqoonsaday Somaliland, haddana waxay ku faaneysay
inay leedahay dhammaan astaamaha u adeegay waddan, iyadoo in ka badan soddon
sanno ka qabsoomeen doorashooyin loo arkay kuwii ugu dimuquraadiga badnaa ee ka
dhaca gobolka.
W/Q: Maxamud Cabdulle
.jpeg)
0 Comments