Imaaraadka Carabta Deeqdii Ugu Badneed oo Raashin ah Soo Gaarsiiyay Soomaaliya

Muqdisho (bulacle.com)– Imaaraadka Carabta ayaa noqday dalkii ugu horreeyay ee ka jawaabaya dalabkii ay dhawaan dowladda federaalka Soomaaliya u dirtay deeq bixiyeyaasha. Guddoomiyaha hay’adda SODMA, Maxamuud Macallin Cabdulle, ayaa sheegay in Soomaaliya ay ku jirto xaalad adag oo ka dhalatay abaarta sii xumaanaysa.

 

Maanta, Dowladda Imaaraadka Carabta ayaa gaarsiisay Soomaaliya deeq raashin ah oo dhan 700 ton, taas oo ah qeyb ka mid ah jawaabta ay siineyso baaqa Soomaaliya. Deeqdan ayaa loogu talagalay in lagu caawiyo dadkii ku dhibtoonayay saamaynta abaarta.

 

Markii la wareegay deeqdan, Maxamuud Macallin ayaa u mahadceliyay safiirka Imaaraadka Carabta ee Soomaaliya, Axmed Juma Al-Rumaithi, isagoo tilmaamay in gargaarkaan 300 ton loo kala qaybiyay magaalada Kismaayo, halka 200 ton loogu talagalay Boosaaso. Sidoo kale, 200 ton oo dheeraad ah ayaa loo diyaarshay gargaarka dadka ku nool degaannada dhulka laga geyn karo iyo gobolka Banaadir.

 

Hay’adda SODMA ayaa si deg-deg ah ugu hawlan in gargaarkaan loo gaarsiiyo dadka u baahan, iyagoo ku dadaalaya in la daboolo baahiyaha dadka ku nool magaalooyinka iyo deegaanada ay abaartu saameysay.

 

Maxamuud Macallin Cabdulle ayaa mar kale muujiyay sida ay muhiim u tahay taageerada Imaaraadka Carabta, isagoo sheegay in xiriirka soo jireenka ah ee u dhexeeya Soomaaliya iyo Imaaraadka Carabta uu yahay mid lagu kalsoon yahay.