Abdulahi Warsame Roble Afhayeenka Wasaaradad Xanaanada Xoolaha Galmudug: "Xarumihii Ugu Badnaa ee Caafimaadka Xoolaha Ayaa La Dhisay.

Afhayeenka Wasaraadda Xanaanada Xoolaha Galmudug Abdulahi Warsame Roble ayaa sheegay in la dhisey xarumihii ugu badnaa ee badbaadada caafimaadka Xoolaha.

Afhayeenka Wasaaradda Xanaanada Xoolaha, Dhirta iyo Daaqa Dowladda Galmudug, Abdulahi Warsame Roble, ayaa shaaciyay in maamulka Galmudug uu dhisay xarumihii ugu badnaa ee daweynta xoolaha tan iyo aas-aaskii maamulka. Tani waxay muujinaysaa dadaal muuqda oo lagu horumarinayo caafimaadka xoolaha iyo wax-soo-saarka la xiriira.

Afhayeenka ayaa tilmaamay in xarumahan cusub ay noqon doonaan kuwo si weyn uga qeyb qaata badbaadinta xoolaha ka jira deegaannada Galmudug, kuwaas oo ah laf-dhabarta nolosha bulshada reer miyiga ah. Xarumaha ayaa lagu qalabeeyay agab casri ah iyo dhaqaatiir xoolaha ah si ay u fuliyaan baaritaanno iyo daweyn joogto ah.

Afhayeen Abdulahi Warsame Roble ayaa yiri “Waxaa sidoo kale la rajeynayaa in xarumahaasi ay gacan ka geysan doonaan yaraynta cudurrada faafa ee ku dhaca xoolaha, korna u qaadaan heerka dhoofinta xoolaha, taas oo faa’iido dhaqaale u leh gobolka.”

Tallaabadan ayaa qeyb ka ah qorshaha dowladda Galmudug ee lagu horumarinayo kaabayaasha dhaqaalaha iyo kor u qaadista nolosha dadka ku tiirsan xoolaha.